News
Adnoddau National Numeracy Day Cymraeg newydd sbon am y tro cyntaf erioed
3 May 2024
View this page in English | Gweld y tudalen hon yn Saesneg
Nod National Numeracy Day yw hyrwyddo ymdeimlad cadarnhaol yn y DU am fathemateg pob dydd, ac rydym ni am iddo fod mor hygyrch â phosib, ledled y wlad. Felly, am y tro cyntaf erioed, mae gennym ni gasgliad o adnoddau Cymraeg – ac mae popeth am ddim!
O Eryri i Abertawe, oedolion a phlant, rydym ni am helpu pawb i deimlo’n hyderus gyda rhifau fel y gallant lwyddo mewn bywyd.
I blant: Y gystadleuaeth Arwyr Rhifau
Mae cystadleuaeth Arwyr Rhifau National Numeracy Day bellach yn FYW ar gyfer 2024! Mae chwe bwndel o wobrau i ysgolion neu grwpiau ieuenctid eu hennill, y mae pob un gwerth £1,000. Mae gwobrau unigol hefyd i chwech o blant sy’n ennill ac 18 sy’n cyrraedd y rowndiau terfynol.
I gymryd rhan, mae angen i blant greu llun o sut y byddant yn defnyddio rhifau yn swydd eu breuddwydion neu yn eu hobïau. Efallai eu bod nhw am yrfa wych fel cerflunydd, perfformiwr stỳnts neu lawfeddyg? Neu a fyddai’n well ganddynt ddawnsio neu blymio yn y cefnforoedd dwfn?
Beth bynnag yw eu breuddwyd, rydym am weld a chlywed sut mae’n defnyddio rhifau! Gall plant o grwpiau ieuenctid, meithrinfeydd, ysgolion cynradd ac uwchradd a rhai sy’n derbyn addysg gartref oll gymryd rhan. Mae’r gystadleuaeth ar agor i blant rhwng 3 ac 13 oed, yn ogystal â phlant a phobl ifanc sy’n derbyn cymorth AAA neu Gynllun Addysg, Iechyd a Gofal, yn y DU yn unig.
Mae taflen waith Arwyr Rhifau ar gael yn Gymraeg, a hefyd mae adnodd fideo gydag isdeitlau i’w ddefnyddio yn y dosbarth.
I oedolion a phlant: Y Big Number Natter
Y Big Number Natter yw’r sgwrs genedlaethol gyntaf erioed yn y DU am rifau. Mae gan bawb ei farn am fathemateg, ac mae rhannu profiadau’n gam cyntaf gwych tuag at fagu hyder gyda rhifau.
Bydd enwogion, dylanwadwyr, arbenigwyr a chyhoedd Prydain Fawr i gyd yn rhannu eu straeon am fathemateg. Boed yn dda, yn ddrwg neu’n ddoniol, mae gan bawb stori am rifau!
Gyda phosteri, sleidiau a thaflenni syniadau am weithgareddau yn Gymraeg, mae popeth fydd ei angen arnoch i sbarduno sgwrs am rifau, a’r cyfle i newid bywydau er gwell.
